نصحوني مرة صحابي بالزواج ... و قالولي بركاك من التعواج


راهي رايحة تديك المواج ... إذا بقيت فالعزوبية


بقيت نطلع في الحساب ... و لقيت كلامهم صواب


و في الغد بعثتلهم نواب ... يطرحوا لأهلي القضية


بابا وافق في الحال ... و قال نجيبوا بنت الخال


و يما جاها في البال ... يخطبولي وحدة بدوية


تفاهمنا على بنت المدينة ... قالو فاهمة ورزينة


راهي تمخمخ في الكوزينة ... وتطبخ طبخات زينة


عولنا وقصدنا الدار ... حاملين في يدينا النوار


ودرنا وحنا زوار ... قاصدين بنت معينة


الخال في بنتو شكر ويزيد ... قارية وما تركتش المسيد






وصحيحة كي الحديد ... بنت العلم والتربية


قلت واش هي الشروط ... راني صرت ليكم مربوط


ومالي عندكم محطوط ... ونزيدلكم الشهرية


قالي يا وليدي سجل ... 20 صباط باش تبدل


و 50 سروال مفصل ... و يكونو ضيقين شوية


وزيد كيلو ذهب صافي ... تجيبو وانت زاهي


والشنتوف ما هو كافي ... راني درت فيكم مزية


بنتي راهي غاية وشريفة ... ما تتركش يدها خفيفة


20 خاتم في القفيفة ... تحطهم في يدها هي


وسلسله غاليه ما تنساش ... والمليون لازم يكون معاك


والحايك مرمة لازم تلقاه ... وتقدمو لبنتي هدية


قالي يا السي موووح ... بلاك تنسى خيط الروح


باش يزيد لبنتي الروح ... تبقالك ديما حية


تشريلها عشر كباش ... والدجاج مشوي ما تنساش



وزيدلها مترا قماش ... هادي حاجة رمزية


بنتي ما تضربش النشاف ... ومن الحمام تخرج بالتلحاف


وشعرها جيبلو حفاف ... وتزور sa mère كل عشية


الطفلة نطقت ملهيك ... يا بابا لازم تنهيه


يتركني نحكم فيه ... ويمشي معايا بالنية


قالي الشرط ما خلاص ... نقراو الفاتحة قدام الناس


قلتلو راني لباس ... ومنين نهرب يا خويا


درنا العرس نهار الخميس ... وكثر فيه الهراج والتهراس


والجمهور راهو نعاس ... والبراح يبرح شوية


جابو العروسة للبيت ... كي شفتها من الخوف بكيت


شعرها على الطابلة محطوط ... وراسها من الشعر مزبوط


رافدة معاها عشر قطوط ... تلعب لعبة هزلية


لقيتها مركبة قطع غيار ... شعرها وحواجبها ولشفار


و كي ضحكت كل شيء طار ... هادي ماركة عصرية


قالت لازم نبقى حرة ... ويماك لازم ترميها برة


وما تكثرش معايا الهدرة ... أنا طفلة متحضرة


قلت يا امرة لازم تفهمي ... ترفدي حوايجك و اخطيني

ههههههههههه

ما رحتش تخطب رحت تشري سيارة

ههههههه
هاذي لي شعرها حرير ....و في حواجبها سر كبير 
و مافي زواجها خير ..... هذي سلعة غالية

ما تغلى بنت الحلال .... و ما تطلب منك محال
و لي تبغي بيت الحلال .... تطلب رب البرية

و لي زينة العقول ... ما تطلب غير المعقول
الهنا مع زين الأصول ..... و المعيشة الهنية

لي حيرني وحرت فيه .... ذاك الأب لي يطلب فيه
بنتك ماهي دابة ليه ... . بنت حتدخل عش الزوجية

السعادة مش بالمال .... و الحلال ماهو بالفان
يارب زين الحال .... و رزقنا زين النية



بارك الله فيك خالد و الله قصيدة شابة و هاني جوبتها بالقافية ديالك
       

وانت و ش مداك تقبل