رأيي الشخصي علاه قالولكم اختارو زوج تخصصات على الأقل جهوية أو محلية مابين التخصصات العشرة لي تختاروهم :
- أولا لازم نفهمو واش معنتها تخصصات جهوية أو ولائية :
هي تخصصات لي متواجدة في الولاية تاعك ، يعني ماشي خارج الولاية .
- الرموز تاعها هي :  
FRR : تخصص تكوين جهوي
FRL: تخصص توجيه محلي
الآن نولو للموضوع علاه تختارو زوج تخصصات محلية على الأقل خصوصا للطلبة لي المعدل تاعهم ضعيف أو متوسط،
- باش تفهمو كمثال فقط :
واحد عندو معدل 14٫00 ، ويروح يخير مثلا 10 خيارات كامل مدارس عليا للأساتذة ، وحنا علابالنا بلي معدل القبول الاولي ليها هو 14 ، يعني ادنى معدل هو 14
- الآن بعد ظهور نتائج التوجيه رايحين نلقاو بزاف طلبة اختارو هذا التخصصات يعني احتمال كبير أنو المعدل تاعها يطلع ، وبالتالي هنا يقدر يصرا مشكل انهم مايقبلولك حتى خيار يعني صفر خيار لانو المعدل تاعك كان أقل من كامل التخصصات لي اخترها ، هذا كمثال (بحكم أن المعدل تاعك ضعيف او متوسط ) وانت رحت تخير غير التخصصات لي غالبا تتطلب معدل شويا عالي
- في هاذ الحالة لما ميمدولك حتى خيار ( يعني صفر تخصص ) هنا تروح لمرحلة اخرى جديدة لي فيها تختار من جديد تخصصات لي هوما يحددوهملك ، يعني يحصرولك الخيارات تاعك مقارنة مع السابق لأن الناس تكون اختارت من قبل وتم توجيهها والمقاعد تاع الجامعات تبدا تنقص .
ولهذا قالولكم اختارو زوج تخصصات جهوية او محلية لأنها خاصة بالولاية تاعك فقط يعني ميجوهاش بزاف ناس ، محصورة على بلديات الولاية تاعك ، وغالبا هاذ الجامعات المحلية تتحمل عدد طلبات الالتحاق بها ، يعني عدد المقاعد تاعها كبير نوعا ما ما يعني انه فيه احتمال كبير معدل الالتحاق بيها يكون ضعيف او متوسط وبالتالي احتمال كبير يمدوهالك .
عكس الجامعات لي فيها تخصصات يجوها طلبة من كل ولايات الوطن .
يعني كي تخير "على الأقل" زوج تخصصات محلية ديرهم مثلا في المراتب الاخيرة باش لا قدر الله يلا مقبلوكش في الخيارات الاولى خصوصا يلا كانو تخصصات لي معروف أن معدلاتها عالية ويكون معدلك نوعا ما ضعيف يولو يقبلوك غالبا في التخصصات الأخيرة المحلية وبالتالي مطيحش في الخيار صفر.
- هذا رأيي الشخصي ، ولكم الخيار والقرار
بالتوفيق لن شاء الله